職趣事

 

近年「安靜離職」（Quiet Quitting）成為不少香港打工仔面對職場倦怠時的「自保機制」，意思係員工只做最低限度工作、不加班、不過份投入。然而，隨住疫情後復工潮、經濟壓力增大，有研究指出，一股「Quiet Thriving（安靜成長）」新風氣正悄悄興起。由員工自己主動調整心態同行為，在困局中尋回工作滿足感。

 

由自保變自救 打工仔學識自我增值

「Quiet Thriving」與「Quiet Quitting」最大分別，就係前者係一種主動應對。「雖然外在工作環境未必理想，但有啲人會選擇喺自己能力範圍內，做小小改變去提升工作投入感。」例如，主動搵同事傾計建立人際關係、爭取參與自己有興趣嘅項目、甚至每日設定一個微小目標完成，唔只幫助自己「返工」，仲要「返得有意義」。

 

 

港女重拾熱情：每日讚自己一件事

34歲任職市場推廣嘅Cherry分享，疫情後公司裁員，佢要一個人頂三個人嘅工作量，曾經有半年每日返工都情緒低落，甚至試過喺公司廁所喊。「我後來睇咗啲心理學文章，開始試吓每日寫低一件自己做得好嘅事。」一開始覺得好尷尬，但一個月後情緒明顯平穩咗，對工作都有多啲掌控感。「唔係每次都要靠公司搞啲咩team building，原來自己都可以慢慢翻身。」

 

三招實踐「Quiet Thriving」：由你開始改變

臨床心理學家建議，如果感到工作失去意義，可以試以下三個做法，幫自己靜靜地茁壯成長：

l   主動做「價值對齊」練習：搵返你覺得有意義或符合價值觀嘅任務，即使係細細地幫輕同事都好。

l   微習慣改變氣氛：例如每朝同一位同事say hi、下晝企出去曬5分鐘太陽，微細行為都會影響心情。

l   為自己定立進步目標：唔一定升職先叫成功，可以係學一個新技能、改善溝通方法等。

 

「Quiet Thriving」反映員工開始意識到長遠職涯唔單止靠公司提供資源，更要自己主動創造空間。「香港打工仔太耐無講『喜歡返工』呢四個字，但其實唔係完全無可能，只要肯靜靜咁開始，工作可以再變得有意義。」