職趣事

 

 

近年裁員潮一浪接一浪，最近Threads有網民發帖分享，公司裁員時叫員工揀方案：「一係要封靚Reference Letter；一係攞一個月糧。」樓主話自己interview過唔少經理級別工種，從未有人真正問佢攞過Reference Letter，覺得攞實質補償更實際，引起唔少網民共鳴，直言「拎封信嚟做咩」！

 

Reference Letter嘅作用仲剩幾多？

 

所謂Reference Letter，一般由前上司或HR撰寫，簡單介紹前員工的工作表現、性格特質與離職原因，過去被視為求職重要佐證，特別係轉行、或申請高層職位時。

 

不過有HR坦言：「依家睇CV多過睇信，真係會逐封睇嘅只係政府工、外資大公司、或某啲行業（例如法律、教育）。」反而直接揾前主管做Reference Check更加實際。

 

 

邊啲人可以幫你寫 Reference Letter？

 

雖然唔係每一份工都實際要求推薦信，但如果你有需要，以下幾種人選通常最合適幫你撰寫 Ref Letter，令信件更具說服力。

 

1.  自己起稿，交比上司簽名：
不少打工仔分享，公司HR或直屬上司忙得不可開交，其實通常都預你自己起一份草稿，等佢哋再改一改或直接簽名。內容可以包括你喺職期間嘅貢獻、工作態度、專業技能等。

 

2. 搵其他人幫手寫：

l   直屬上司/前上司：最具權威，對你工作表現最了解，可信度最高。

l   HR部門：可以從公司層面出信，一般語氣較中性，偏重工作記錄。

l   同事/部門主管：如果你同上司關係一般，可以考慮由合作密切嘅同事幫手寫推薦，特別適用於跨部門合作。

l   實習導師/項目合作夥伴：對於學生、Freelancer或合約工，亦可考慮由實習方撰寫。

 

3.     無信都唔怕，其他材料都幫到手：

l   前僱主Reference Check：HR會主動聯絡，信任度比一封信更高。

l   項目Portfolio、表現獎狀等：用硬證據展示實力，未必輸比推薦信。

 

HR：Reference Check更實際

 

有招聘顧問指，現時企業更傾向透過電話或電郵直接聯絡前公司主管做「Reference Check」，確認候選人係咪真材實料：「封信可以寫到天花龍鳳，但人哋一個電話打去你前老細度問下，真真假假就見光。」

 

職場顧問提醒，若然公司解僱你，但又要求你自願辭職換取推薦信，其實有權衡空間：「除非你真係有特別用途要封信，例如準備申請外國工作或讀書，否則長遠計可能實際賠償更實用。」