職趣事

 

 

「我出嚟做嘢咁多年，一直都有俾家用屋企，雖然唔算好多，但係每個月準時交。心諗所有打工仔都應該要咁做，但點知同朋友傾偈先發現，原來唔係人人都要俾——仲有啲人每個月有錢收！」

 

一名網民喺 Threads 分享自己嘅經歷，原本以為交家用係出社會後理所當然嘅責任，卻意外發現，原來唔同家庭對「家用」有截然唔同嘅態度。有人認為「糧可以遲，但家用唔可以唔俾」，有人則從來未被要求交過一毫子。背後嘅差異，似乎同家庭背景、兄弟姊妹身份，甚至父母心態都有密切關係。

 

家境愈基層，家用愈重？

樓主觀察到，一般基層家庭嘅仔女，工作後差唔多一定要交家用，數目唔少之餘，仲要準時。如果遲交少交，父母可能會追問，甚至每日都要聽唔少怨言。對佢哋嚟講，家用並非「孝心」，而係實際生活所需。

 

去到中產階層，情況就唔同得多。父母可能只係要求仔女交象徵式金額，或者平日冇乜要求，大時大節請屋企人食餐飯就足夠。就算幾個月遲咗交，父母多數都唔會太計較。

 

至於中上或富裕家庭，仔女反而完全唔駛俾家用，甚至仲可以定期收到零用錢。正如有網民直言：「富二代食老豆老母，甚至食埋亞爺阿嫲，唔駛俾家用係常識。」

 

 

同一家庭，待遇都可以唔一樣

有趣嘅地方係，就算喺同一個家庭入面，兄弟姊妹之間都可能有唔同「待遇」。有網民分享，自己搵兩萬蚊一個月，要交三千蚊家用兼自租單位，媽媽仍覺得佢生活富足；反而細佬人工三萬，交一萬家用，仲同女朋友一齊住喺屋企兼養車，媽媽卻覺得佢「窮困」。

 

性別差異亦十分明顯。不少留言都指，女仔往往要交得多啲，因為父母會認為女兒比較貼心，自然會多付出。至於兄弟之間，通常阿哥要交多過細佬，甚至要承擔多啲責任。有女網民憶述，自己當年考到大學卻因為冇錢而冇得讀，被迫出嚟養家；但到細佬考大學時，媽媽就話「男仔一定要讀」，仲願意借錢送佢出國升學。

 

網民心聲：孝順定負擔？

Threads 討論區入面，不同網民道出自己嘅經歷，反映出「家用」對大家嘅意義唔盡相同。有人覺得俾錢係應份：「未移民之前，我每個月俾一千至一千五百，算係責任所在。」亦有人質疑：「點解要俾？你有手有腳咪自己去搵工賺錢囉，又唔係我要求自己出世。」

 

有啲人選擇用另一種方式表達心意，例如雖然冇恆常交家用，但會喺過年時俾父母幾萬蚊大利是一人一封，算係另一種形式嘅支持。亦有人直白地話，對富裕家庭出身嘅人嚟講，根本冇呢個問題，因為「父母反而仲養緊仔女」。

 

家用背後，係愛定不平等？

從金錢角度睇，家用喺基層家庭係生活必需，中產家庭係心意象徵，去到富裕家庭甚至變成父母繼續支援子女嘅方式。但如果拉闊少少去睇，其實家用仲折射咗香港社會入面嘅傳統觀念——男仔要出頭，女仔要孝順，阿哥要做表率，細佬就可以「輕鬆啲」。

 

有人無奈地笑言：「如果有得揀，我下世一定要做有家姐嘅細佬！」