職趣事

香港有網民喺社交平台Threads分享自己嘅職場經歷，指自己一直以為同上司相處融洽，平日返工氣氛輕鬆，上司不時關心佢，生日又一齊慶祝、送禮物，有時仲會傾啲私人話題，感覺就好似朋友咁。平時工作上亦互相幫忙，令佢一直都覺得返工好開心。

不過，一切喺佢遞辭職信嗰一刻起出現轉變。佢話，上司反應令人錯愕，竟然用似笑非笑嘅語氣講：「你去新公司會好忙，成日OT啦！」仲講話新公司遠、交通費貴，話人工加咗都未必有著數。樓主坦言聽完覺得無奈，唔知上司係真心關心，定係不滿佢跳槽、人工升咗，甚至覺得上司根本唔想佢走。

帖文引起唔少網民共鳴，不少人留言分享自己對「上司與下屬關係」嘅睇法，有人話：「上司對你好，往往係因為你仲有利用價值」，提醒樓主唔好將感情擺喺工作關係入面；亦有人分析上司語氣惡毒，可能係想挽留人但方式錯咗，或者係表面友好，實情一早冇真感情。

亦有冷靜網民指出，辭職係職場常態，唔使補腦過多：「信已經遞咗，唔好返轉頭，新工努力做就啱」、「離職只需講有新發展，唔使交代太多」。大家一致認同，無論上司點反應，保持得體態度離職，自己行得正企得正先係王道。