「香港人真係好鍾意返工」到底是自嘲還是反諷，都不用深究了，難道「九龍人」同「新界人」又唔鍾意返工嗎？好了，無可避免地、毫無憐憫地返工吧，途中，大家最怕遇到甚麼呢？

遇到肚痛

「本人住天水圍，公司在觀塘，每日返工都提心吊膽，因為車程長，一旦肚痛就真的不知如何是好！當你越膽心就越肚痛，越肚痛就越擔心！試過有一次真的急到爆，下車後衝到洗手間竟然掛住『清潔進行中』 …… 那種絕望感非筆墨可以形容 …… 」

遇到老細

「返工當然最怕遇到老細，大家相對無言，又怕他談起公事，更怕他問起家事！又擔心他覺得我返得太晏，又驚返到公司其他同事會『另眼相看』。有一次搭地鐵返工就正正遇到老細（仲要同一車卡 …… ）於是我馬上落車以為自己好醒，怎知車門關上後又突然打開，老細正好看見我 …… 」

遇劫

「我好鍾意一朝早返工！天未光就出門口！可以避開人潮嘛！誰知道避得開上班的人，避不開打劫的賊！救命呀！」

遇「溺」

「住在坪洲的我每天要搭船返工，航程大半個鐘，一向都無風無浪十分安全，我所講的遇『溺』是某些缺德無良狗主一早放狗留下的陷阱！有一次真的『踩中了大號的』，又趕住返工，又不敢返工 …… 」

遇害

「好多人最怕返工時遇到塞車、冇位坐、好迫人、有人放屁、有人幾日冇沖涼等等，我就最怕遇到那些窮得沒錢買headphone的人，用手機睇片要把音量調到無限大，一定要跟同車的人分享才心足的人，我可以用四個字去形容：真‧靠‧害！」

無論你是80後、90後定千禧後，如果你在職場上遇到甚麼新奇有趣的遭遇，不妨公諸於世跟大家分享一下兩下三下。

電郵地址：[email protected]