不少打工仔喺職場上都試過犯錯，但有啲錯誤可能影響深遠，甚至影響成個事業發展。近日，一名網民喺Threads發文，坦白自己曾經喺一間夢寐以求嘅公司打工，但因為各種離譜行為，最後俾公司勸退。他詳細數晒自己嘅「黑歷史」，包括遲到、hea做、開會失言，甚至醉酒返工，令網民熱烈討論。
職場災難逐一回顧 工作態度完全「當自己老細」
佢話，當初入咗一間好多fresh grad都想入嘅夢幻公司，但入去之後完全冇當回事，態度鬆散，搞到最後自己都玩完。佢承認，明明公司規定九點返工，但佢幾乎日日都十點先出現，從來唔守時間。疫情之後，公司開始要求員工返辦公室，但佢竟然自作主張，覺得自己可以WFH，老細明明開口叫佢返，都當聽唔到。
除咗時間觀念差，佢對份工本身都唔上心，日日返工唔係玩手機就係走入電話間睇YouTube，基本上「半個鐘做嘢，三個鐘hea」。學過嘅嘢從來唔記，搞到每次要做返同一樣工作都要由零開始問過，成個學習能力接近零。佢又唔識同同事搞好關係，成日自己一個人，唔主動交流，完全冇融入公司文化。
最爆笑嘅係，佢有一次開Zoom會議時忘記咗關咪，喺會議入面直接講咗句「好悶呀」，結果全公司都聽到，場面極度尷尬。而佢每日出嘅Email少得可憐，根本冇任何貢獻，生產力低到誇張。
午飯時間，佢仲試過食足兩個幾鐘，甚至試過飲酒之後滿面通紅咁返公司。更誇張嘅係，佢有次同內地客戶開會時因為討論上有分歧，結果越講越火爆，直接同對方對罵，搞到公司形象受損。而公司明明有Dress Code，佢依然我行我素，完全唔理著裝規定，隨心所欲。
被公司勸退後 痛改前非變高效員工
一系列「hea爆」行為，最後導致佢喺公司捱足一年後被「Counsel Out」（即被勸退）。佢話，當時真係後悔到不得了，甚至希望有機會重新嚟過。好彩佢履歷上仲有呢間公司個名，最終成功搵到另一間同樣知名嘅企業，於是決心重新做人。
入新公司之後，佢態度大變，開始準時返工，專心學習，將每樣學到嘅嘢記低，唔再犯同樣錯誤。佢主動同同事建立關係，做事變得更有責任感，每日都認真完成工作，確保自己成為高效員工。佢話，而家公司同事對佢嘅評價係「可靠又高效」，完全唔同以前嗰個「hea王」。而家每次見到啲新入職嘅後生仔，佢都會諗起自己當年有幾離譜，真係感觸良多。
網民熱議：公司真係好仁慈
呢篇帖文出街之後，網民紛紛熱烈討論，有人留言話：「你老細咁都無封殺你？Reference Check嗰陣時冇黑你，公司仲要忍你一年先勸退，真係好仁慈！」。
另一個網民就分析：「最大問題係學唔識經驗、飲醉酒返工、同客對罵，呢啲都係職場大忌！啱啱畢業嘅新人一定要學識適應公司文化，知道點樣同持份者合作。」，仲有人笑話：「呢間公司真係好慘，請咗你一年先炒，真係超級有耐性！」，更有網民直接話：「完全係薪水小偷！」。
呢次經歷提醒咗所有打工仔，返工唔係玩嘢，職場態度同表現先係決定你事業發展嘅關鍵。如果想企穩陣腳，唔單止要提升專業能力，最基本嘅工作態度同責任感都要有，否則只會害人害己。
好工推介
職場熱話
- 1
- 2
-
畢業後為一紙聘書不惜自降身價？HR：只會賠了夫人又折兵
TOP 1 -
見工被HR質疑學歷兼查家宅 仲被揶揄「冇老豆」
TOP 2 -
郵政署招聘客戶服務員 月薪$16,258 DSE 5科2級申請得！
TOP 3 -
AI衝擊加上地緣政治不明朗 應屆畢業生就業前景 可能係40年嚟最差？
TOP 4 -
歐洲初創圈掀起996爭論：賣命式工作文化是否值得仿效？
TOP 5
-
穩定工作、升職加薪、結婚生子 真係成功人生方程式？ 網民：「不如趁早尋找屬於自己的生活節奏」
TOP 6 -
返工壓力爆煲情緒出問題 辭職又驚冇收入 打工仔點樣走出死循環？
TOP 7 -
AI衝擊職場？研究：實際影響仍然輕微 反而增加人類工作量
TOP 8 -
【打工仔必知】惡劣天氣下唔返工會唔會被扣人工？ 僱主可以要求WFH？
TOP 9 -
律政司招聘合約法律書記 月薪$23,585
TOP 10
