職趣事

 

天文台掛起黑色暴雨警告信號，大部分打工仔都可以安心留喺屋企，但有網民喺 Threads 分享，黑雨一樣逃唔過媽媽轟炸。

 

樓主表示，朝早十點，媽媽突然「bomb」一聲推開房門，見到佢坐喺床上篤電話，即刻皺眉問：「唔洗做嘢呀？」事主解釋，因為公司冇電腦，要等天氣好轉先返工，點知媽媽完全唔收貨：「其實出面無乜雨，你可以坐地鐵再轉巴士返工喎，你份人就係咁，冇上進心、唔長進、咩都做唔成……」話未完，媽媽已經轉身走出廳，再向老豆 repeat 多一次，令事主當場黑人問號：「黑雨唔返工都係我唔上進？」

 

生病請假都變成「懶惰證據」

 

其實呢啲情況，對佢嚟講唔算新鮮。事主分享，早幾年過年時自己病到暈低床，冇力落地，第二日請病假休息，媽媽第一句唔係問佢好啲未，而係同佢講：「成日請病假，你上司會對你印象唔好喎。」佢忍唔住心諗：「我病成咁，你淨係擔心上司點睇？」引發唔少網友即時共鳴。

 

 

旅行、轉工、OT　樣樣有嘢講

 

就算係請年假去旅行，媽媽都可以一秒變預言家：「公司裁員一定第一個炒你！」；在家工作（WFH），明明手機覆緊公司訊息，媽媽一樣可以話：「一日到黑喺屋企！」轉工嘅時候更加經典，做咗八年一樣會被懷疑「份份都做唔耐」。

 

就算係 OT，媽媽都唔認同。事主話有一次因為有急單OT到夜晚，解釋畀媽媽聽係幫客人處理臨時狀況，媽媽即刻反駁：「你咪縱慣咗個客囉！即刻話個客丫嘛，等佢以後唔敢丫嘛！」事主當場無言：「點樣話個客唔好有急單呀？而且人哋又唔係無理取鬧。」佢又反問媽媽以前有冇咁樣話客，媽媽仲自豪咁話：「梗係啦！我會據理力爭，唔係畀個客攞便宜！」最後事主心裡只得一句 OS：「怪唔知得你最後俾人炒咗……」

 

網民：上世代冇勞權意識

 

唔少網民留言，認為上一代普遍冇咩勞權意識，覺得返工係賣身俾公司，遇到唔公平都會勸你唔好怕蝕底，驚公司嬲咗你。戰後嬰兒潮一代喺資源有限嘅年代成長，工作機會得來不易，所以將「穩定飯碗」視為人生頭等大事；但對新一代嚟講，工作唔單止為咗糊口，亦應該平衡生活同精神健康。

 

事主最後笑言，媽媽依然堅持用幾十年前嘅「心得」教佢做事，聽得多都無益。「係啦，上一代就係咁，改唔到嘅，笑一笑算啦。」而呢篇有關媽媽轟炸嘅分享，亦再次掀起新舊世代職場觀念嘅大辯論。