職趣事

 

近年越來越多打工仔開始反思，喺職場中「唔合群」是否真係等同於「唔識做人」。最近一則在社交平台 Threads 帖文，引起唔少打工族共鳴，有人感嘆即使努力想融入，但最終都因個性使然而選擇獨處。

 

該名網民坦言，自己大部分時間都獨自食午餐，習慣喺午餐時段睇書、打機，唔太主動開口傾偈，只係有人搵先會應對。雖然曾經嘗試加入同事飯局，甚至事前準備好話題，但最後總覺得自己好似「搭枱」，難以真正融入。佢仲自言 MBTI 性格測驗結果係 91% 內向型（Introvert），但並非社交恐懼，只係一返到工就會「講唔出聲」。

 

帖文一出，網民反應熱烈，不少人紛紛留言分享自己相似的經歷。有留言指：「職場係講關係多過實力，你做到飛天都唔夠擦鞋叻。」亦有人認同：「做唔到就唔好勉強，但至少要俾人感覺你願意溝通，唔係人哋會亂估你嘅性格。」

 

亦有自稱「自願唔合群」的網民回應話，自己只與同事保持工作上嘅溝通，覺得只要有效率、有交帶，就唔需要強行交際，強調「搵到自己舒服嘅返工模式最重要」。有網民更加坦率表示，唔會刻意取悅不明事理嘅上司，反而應該著重實際表現與真誠溝通。

 

 

三種方法幫助內向打工仔適應職場社交

 

1.     建立最低限度嘅互動習慣
即使你唔善言辭，都可以每日主動同幾位同事講聲「早晨」、「食咗飯未？」咁簡單幾句，慢慢令同事知道你願意溝通。

 

2.     選擇合適嘅社交方式
唔一定要參加大群人聚會，可以選擇細小群組或者一對一嘅交流，例如同一兩位熟悉嘅同事午餐，較易建立信任與連結。

 

3.     把握工作上嘅溝通機會展示自己
就算平時唔多講私事，都可以喺會議、簡報或電郵中，清楚表達立場與想法，咁樣唔但保留個人風格，仲可以建立專業形象。