職趣事

 

返工「冇嘢做」，其實好辛苦？聽落份工似乎「幾爽」，實際上卻係一種精神折磨。Threads 上有唔少網民分享自己嘅「扮工日常」，有人直言長時間無嘢做，壓力大到懷疑人生，寧願忙到冇停手，都好過每日「揼波鐘」。

 

「返工冇嘢做」變成精神壓力

有網民喺 Threads 發帖，話自己「工作壓力源於冇嘢做」，明明一啲半日就完成嘅工作，要刻意拖慢一日完成，仲要每日「等食飯等收工」。

 

帖主坦言，雖然同朋友呻，對方只會羨慕：「我都好想似你咁唔使做嘢都有糧出。」但佢強調，事實係 扮忙比真正做嘢更加辛苦，怕畀上司覺得冇工作量，隨時被「裁走」。

 

 

「扮工」花式百出：抄心經、網購、loop Threads

留言區唔少網民都表示「完全明」，仲分享自己嘅花式扮工辦法。有網民話悶到「同 ChatGPT 傾計」，亦有人笑言日日「loop Threads、聽 podcast、睇電子書」，但枱面同樣要保持「好忙嘅樣」。

 

亦有人自揭「扮工日常」：有時廁所 pantry 兩邊走，有時抄心經抄到手攰，甚至無啦啦網購洗咗幾千蚊。有人話自己「等緊12點 lunch，救命」，更有人直言壓力大嘅原因之一，係怕自己其實係「冗員」，覺得太得閒冇貢獻，慢慢就唔知自己喺度做乜。

 

寧願忙啲 有安全感

有網民形容：「全世界都知你無嘢做，但又要扮有嘢做，個位又開揚，真係壓力爆棚。我寧願有啲嘢做，時間過得快啲，至少覺得自己有貢獻。」

 

亦有人分享自身經歷，指曾經返過一份工，公司文化係「hea就hea，chur就chur」，初時仲算有少少工作量，但隨住生意愈嚟愈差，最終全日都無嘢做，日日要坐定定裝忙，結果未過試用期就被辭退。

 

空閒≠輕鬆，長期「扮工」或致倦怠感

有職場顧問指出，唔少人誤會「冇嘢做」就等於輕鬆，但事實係長時間無所事事，反而會令員工失去成就感，甚至產生焦慮同倦怠感。

 

佢建議，如果工作量不足，可以主動提出協助其他部門，或者利用空閒時間進修，報讀課程或考專業資格，提升自我價值。同時，適度「hea」得有智慧，唔好因為一時貪玩影響職場形象。

 

你又有冇試過「扮工」嘅經歷？對你嚟講，係享受多啲，定係覺得更辛苦？