職趣事

 

「日日返工返到好攰，放假又唔夠時間休息。」呢句係唔少打工仔嘅心聲。喺 Threads 上就有網民呻：「星期六要拍拖，星期日仲要陪屋企人、做家務，根本完全休息唔到，結果放完假都仲係攰到傻。」

 

點解會咁呢？其實好多人都搞錯咗一個重點：休息唔等於瞓覺，瞓夠都未必代表精神返晒嚟。 真正嘅休息係要令大腦同身體重新平衡。以下 7 個方法，或許可以幫你 weekend 真正「叉到電」。

 

1. 分清體力攰定精神攰

有時明明訓咗十個鐘，第二日都仲覺得攰，因為嗰種唔係身體累，而係「腦攰」。長時間用腦，會令大腦好興奮，但身體就處於低檔狀態，所以愈瞓愈亂。呢個時候，要嘗試轉換方式，例如做吓運動、畫吓畫，甚至行出街呼吸新鮮空氣，都比瞓多幾個鐘更有效。

 

2. 學識「主動休息」

所謂主動休息，即係透過運動、唱歌、畫畫、跳舞等等，令自己投入另一種狀態。好多研究都證明，做半個鐘運動，出一身汗，唔單止唔會更攰，仲會令你覺得精神晒。

 

 

3. 斷線式休息

每日都俾手機訊息、email 追住跑，其實好傷腦。試吓設一個「斷線時段」：例如食飯時間唔覆 message，瞓前一個鐘收埋手機。短短一個鐘，已經可以令腦袋真正「落線」。

 

4. weekend 要學識取捨

好多時 weekend 我哋想一次過見朋友、拍拖、做家務、陪屋企人，結果每樣都做啲，但全部都唔夠。其實最重要係排優先次序：問自己「今個 weekend 對我最重要係邊樣？」做好一樣，其他延遲都無問題。

 

5. 情緒都要休息

返工唔係淨係身體同腦攰，仲有心攰。試吓搵個可以傾訴嘅朋友，或者寫日記，將心裏面嘅壓力同情緒釋放出嚟。情緒有出口，心靈先至可以真正休息。

 

6. 去大自然充電

唔少研究發現，只要喺綠色環境逗留 20 分鐘，專注力同心情都會明顯改善。唔需要特登去旅行，簡單喺附近公園坐吓，或者週末去行山，都已經好有效。

 

7. 建立固定作息

Weekend 成日想「瞓返夠本」，但其實瞓到中午反而令身體時鐘大亂。最理想係每日差唔多時間瞓同起身，保持睡眠規律，精神狀態自然會好啲。

 

休息唔係奢侈，而係必需

打工仔日日忙，生活好似永遠停唔到。其實真正嘅關鍵係：休息唔係純粹停低，而係選擇合適嘅方式去回氣。 學識分清自己邊種攰，揀啱方法，weekend 先至真係可以叉返滿，下星期返工都冇咁崩潰。