職趣事

 

職場上遇到一個壞脾氣老細已經夠令人壓力爆煲，但原來陰晴不定嘅上司，對員工嘅心理打擊可能更大。美國史蒂文斯理工學院（Stevens Institute of Technology）最新研究發現，管理者如果經常忽冷忽熱，員工嘅士氣同表現會明顯下跌。

 

「變臉式領導」比持續惡老細更毒

研究團隊喺《應用心理學期刊》（Journal of Applied Psychology）發表報告，指出呢類「Jekyll and Hyde 式」上司（即性情忽冷忽熱、時好時壞）對員工嘅破壞力，比起一個長期刻薄嘅上司更強。

 

帶頭研究嘅許皓瑩博士指出：「公司通常只會喺上司長期表現出濫權或侮辱行為時介入，但對於偶爾惡爆、平日又好人嘅領導者，反而比較容忍。不過研究顯示，呢種間歇式嘅壞行為，對組織嘅傷害更深遠。」

 

員工無所適從：「唔知今日會遇到邊個老細」

研究發現，當上司情緒反覆無常，員工會因為無法預測老細今日嘅態度而變得焦慮。許博士解釋：「如果每日都要猜緊究竟今日出現嘅係『好警察』定『壞警察』，員工會被搞到情緒疲憊、士氣低落，工作表現自然打折。」

 

比起長期惡爆嘅老細，至少員工「知敵為誰」，可以學識避雷或自保；但面對一個一時笑容可掬、一時暴怒摔嘢嘅老細，員工就會長期處於精神緊張狀態，難以專注工作。

 

 

「好轉」行為無法抵銷之前嘅傷害

研究仲指出，老細即使試圖喺惡爆之後「補數」，用友善或體貼行為想修補關係，反而會令員工更混亂、更大壓力。

許博士話：「改返做所謂『道德領導』唔代表就可以抹走之前嘅壞行為。相反，呢種反覆切換會加深員工對領導者嘅不信任感。」

 

情緒反覆可「傳染」到整個團隊

更令人意外嘅係，呢種「變臉式領導」唔止影響直接下屬。研究發現，即使只係觀察到自己主管嘅上司（即「上上司」）情緒反覆，員工都會變得信心不足、情緒疲倦，甚至開始懷疑自己上司嘅能力。

 

團隊之間亦可能出現「情緒傳染」效應，員工會模仿管理層嘅負面行為，令整個部門嘅氣氛陷入惡性循環。

 

有咩特徵？五大「毒性領導」行為

研究列出五個常見嘅「毒性老細」特徵，睇下你身邊有冇中招：

l   經常懷疑同事或競爭對手會「搞佢」。

l   搶功勞、愛將團隊成果據為己有。

l   經常將自己同他人比較。

l   自我價值完全取決於最近嘅業績。

l   嫉妒下屬成功，難以真心欣賞他人。

許博士提醒，如果公司容忍呢種行為，最終會令員工倦怠、辭職潮加劇。

 

壞文化令人才流失　專家籲：從根源改善情緒管理

英國管理學會（Chartered Management Institute）2023 年調查亦指出，三分之一嘅打工仔曾因為壞公司文化而辭職；而當中一半認為老細無能者，更計劃喺一年內離開。

 

許博士建議，企業應該從心理層面入手，幫助領導者控制脾氣、改善衝動行為。「間歇式濫權往往源自衝動，透過情緒管理訓練有機會改善，減少對團隊嘅傷害。」